పర్యావరణహిత వినాయక విగ్రహాలను వినియోగించాలి
తిరుపతి రూరల్(సెప్టెంబర్ 13): వినాయక చవితి పండుగను పురస్కరించుకుని పర్యావరణ పరిరక్షణ, పరిశుభ్రతపై ప్రజల్లో అవగాహన కల్పించేందుకు తిరుపతిలో అవగాహన కార్యక్రమం నిర్వహించారు. మున్సిపల్ చైర్మన్ ఎం. జయకృష్ణ, ఆంధ్రప్రదేశ్ కాలుష్య నియంత్రణ మండలి రీజినల్ ఆఫీసర్ ఎం.బి.ఎస్. శంకరరావు ఆధ్వర్యంలో పాంప్లెట్లు, పోస్టర్లను ఆవిష్కరించారు.
ఈ సందర్భంగా అధికారులు మాట్లాడుతూ వినాయక చవితి వేడుకలను భక్తిశ్రద్ధలతో పాటు పర్యావరణ పరిరక్షణకు ప్రాధాన్యతనిస్తూ నిర్వహించాలని సూచించారు. ప్లాస్టర్ ఆఫ్ పారిస్ (పిఓపి) విగ్రహాలకు బదులుగా మట్టి వినాయక విగ్రహాలను వినియోగించాలని, రసాయన రంగులు లేని విగ్రహాలను ప్రోత్సహించాలని కోరారు. విగ్రహాల నిమజ్జనం సందర్భంగా జల వనరులు కలుషితం కాకుండా మార్గదర్శకాలను పాటించాలని సూచించారు. ప్రజలు, నిర్వాహకులు పర్యావరణ పరిరక్షణలో భాగస్వాములు కావాలని పిలుపునిచ్చారు. కార్యక్రమంలో మున్సిపల్, కాలుష్య నియంత్రణ మండలి అధికారులు, సిబ్బంది పాల్గొన్నారు.
